A
A A A
a A

სიახლეები ყველა სიახლე

  • შეხვედრა ყაზახეთის რესპუბლიკის ცენტრალური საარჩევნო კომისიის წარმომადგენელთან

    შეხვედრა ყაზახეთის რესპუბლიკის ცენტრალური საარჩევნო კომისიის წარმომადგენელთან

    12 დეკემბერი, 2018

    საქართველოს ცენტრალურ საარჩევნო კომისიაში (ცესკო) ყაზახეთის რესპუბლიკის ცენტრალური საარჩევნო კომისიის წარმომადგენელთან შეხვედრა გაიმართა.

    ყაზახეთის რესპუბლიკის ცესკოს შშმ პირების უფლებებზე მომუშავე სამუშაო ჯგუფის წევრს, ფარატ უსუფდზანოვს ცესკოს კოორდინაციის, დაგეგმვისა და ანგარიშგების დეპარტამენტის ხელმძღვანელი სოფიო სიჭინავა და ამავე დეპარტამენტის თანამშრომლები ივეტა ჭელიშვილი და ქეთევან ვარდანაშვილი შეხვდნენ. მათ ფარატ უსუფდზანოვს ინკლუზიური საარჩევნო გარემოს უზრუნველყოფის მიზნით საქართველოს საარჩევნო ადმინისტრაციის მიერ გაწეული საქმიანობა გააცნეს და დეტალურად ისაუბრეს შშმ პირებისთვის საარჩევნო უფლების რეალიზების ხელშეწყობის თვალსაზრისით შეთავაზებული სერვისების შესახებ, მათ შორის უსინათლო ამომრჩევლებისთვის ჩარჩო ფორმის გამოყენების თაობაზე.

    შეხვედრა ფარატ უსუფდზანოვის ინიციატივით დღეს გაიმართა, რომლის მიზანიც საარჩევნო პროცესში შშმ პირთა ჩართულობასთან დაკავშირებით საქართველოს საარჩევნო ადმინისტრაციის გამოცდილების გაზიარება იყო.

    სრულად
  • ცესკოს ხელმძღვანელმა პირებმა „მრავალეროვანი საქართველოს“ წარმომადგენლებთან 2018 წლის პრეზიდენტის არჩევნები განიხილეს

    ცესკოს ხელმძღვანელმა პირებმა „მრავალეროვანი საქართველოს“ წარმომადგენლებთან 2018 წლის პრეზიდენტის არჩევნები განიხილეს

    11 დეკემბერი, 2018

    „მრავალეროვანი საქართველოს“ წარმომადგენლებთან გამართულ შეხვედრაზე 2018 წლის საქართველოს პრეზიდენტის არჩევნები განხილვის მთავარი თემა იყო. ცესკოს თავმჯდომარემ, თავმჯდომარის მოადგილემ და ცესკოს მდივანმა არასამთავრობო ორგანიზაციის წარმომადგენლებთან ერთად 2018 წლის პრეზიდენტის არჩევნებისთვის ეთნიკური უმცირესობებით დასახლებულ რეგიონებში საარჩევნო ადმინისტრაციის მიერ გაწეულ საქმიანობებზე იმსჯელეს. მათ ასევე ისაუბრეს საარჩევნო პროცესში არსებულ ტენდენციებსა და გამოწვევებზე, რომელიც აღნიშნული არჩევნების მონიტორინგის შედეგად გამოიკვეთა. „მრავალეროვანი საქართველოს“ წარმომადგენლებმა საარჩევნო გარემოს გაუმჯობესებისა და კონკრეტულად, ეთნიკური უმცირესობების მიმართულებით შემუშავებული რეკომენდაციებიც წარმოადგინეს.

    „ჩვენი მსჯელობის არეალი ძირითადად მოიცავდა ეთნიკური უმცირესობებით დასახლებულ რეგიონებსა და იქ არსებულ გამოწვევებს. ძალიან მნიშვნელოვანია კომუნიკაცია საარჩევნო ადმინისტრაციასა და არასამთავრობო სექტორს  შორის. ჩვენ აუცილებლად გავაგრძელებთ დიალოგს  არასამთავრობო სექტორთან  იმ მიზნებისთვის, რაც საარჩევნო პროცესის გაუმჯობესებას და დახვეწას ემსახურება“ - აღნიშნა თამარ ჟვანიამ შეხვედრის დასრულებისას.

    შეხვედრა დღეს, არასამთავრობო ორგანიზაცია „მრავალეროვანი საქართველოს“ ინიციატივით გაიმართა.

    სრულად
  • ცესკოს წარმომადგენლები სომხეთის რესპუბლიკაში გამართულ ვადამდელ საპარლამენტო არჩევნებს დააკვირდნენ

    ცესკოს წარმომადგენლები სომხეთის რესპუბლიკაში გამართულ ვადამდელ საპარლამენტო არჩევნებს დააკვირდნენ

    11 დეკემბერი, 2018

    ცენტრალური საარჩევნო კომისიის წარმომადგენლები სომხეთის რესპუბლიკაში 9 დეკემბერს გამართულ ვადამდელ საპარლამენტო არჩევნებს დააკვირდნენ.

    ცესკოს რეგისტრაციების განყოფილების უფროსი ეკატერინე ფერაძე, საზოგადოებასთან ურთიერთობის დეპარტამენტის თანამშრომელი ლალი ლაშხი და საარჩევნო კომისიებთან ურთიერთობისა და ინფორმაციის მართვის განყოფილების თანამშრომელი ლევან კაპანაძე რამდენიმე საარჩევნო უბანზე დააკვირდნენ კენჭისყრის მიმდინარეობას და დაესწრნენ როგორც ამომრჩეველთა რეგისტრაციის,  ისე ხმის მიცემის პროცესს და უბნების დახურვის შემდეგ კი ხმების დათვლის პროცედურებს.

    ვიზიტის ფარგლებში გაიმართა შეხვედრა სომხეთის რესპუბლიკის ცენტრალური საარჩევნო კომისიის თავმჯდომარესთან, რომელსაც ქართული მხარის დელეგაციასთან ერთად სხვადასხვა ქვეყნის საარჩევნო ადმინისტრაციების წარმომადგენლები ესწრებოდნენ. შეხვედრის მონაწილეებს სომხეთის რესპუბლიკის ცენტრალური საარჩევნო კომისიის თავმჯდომარემ დეტალური ინფორმაცია მიაწოდა იმის შესახებ თუ როგორ ემზადებოდა სომხეთის საარჩევნო ადმინისტრაცია ვადამდელი საპარლამენტო არჩევნებისთვის. გარდა ამისა, შეხვედრის მონაწილეებს ინფორმაცია მიაწოდეს სომხეთის საარჩევნო სისტემის, საარჩევნო ადმინისტრაციის დაკომპლექტების წესის, საარჩევნო სუბიექტების დაფინანსების წესისა და სხვა მნიშვნელოვანი ასპექტების შესახებ.

    ცესკოს დელეგაცია სომხეთის რესპუბლიკის დედაქალაქ ერევანში სომხეთის რესპუბლიკის ცენტრალური საარჩევნო კომისიის მოწვევით 7-10 დეკემბერს იმყოფებოდა.

    სრულად
  • შეხვედრა საარჩევნო სისტემების საერთაშორისო ფონდის (IFES) პრეზიდენტთან

    შეხვედრა საარჩევნო სისტემების საერთაშორისო ფონდის (IFES) პრეზიდენტთან

    7 დეკემბერი, 2018

    ცენტრალური საარჩევნო კომისიის (ცესკო) თავმჯდომარე თამარ ჟვანია საარჩევნო სისტემების საერთაშორისო ფონდის (IFES) ახლად არჩეულ პრეზიდენტ ენტონი ბანბერის შეხვდა. შეხვედრა ცესკოში გაიმართა და მას ცესკოს პრეს-სპიკერი ანა მიქელაძე, IFES-ის პროექტის ხელმძღვანელი ქეთი მაისურაძე და IFES-ის ევროპისა და ევრაზიის პროგრამის ოფიცერი ქეთი შუბითიძე დაესწრნენ.

    შეხვედრაზე მხარეებმა საქართველოში მიმდინარე საარჩევნო პროცესების შესახებ ისაუბრეს. IFES-ის პრეზიდენტმა საარჩევნო ადმინისტრაციის საქმიანობა დადებითად შეაფასა და აღნიშნა, რომ არჩევნების ადმინისტრირების მიმართულებით საარჩევნო ადმინისტრაციის წარმატება ცალსახაა. მისივე თქმით, ბოლო წლების განმავლობაში საქართველოს საარჩევნო ადმინისტრაცია მნიშვნელოვნად განვითარდა.

    საარჩევნო სისტემების საერთაშორისო ფონდის პრეზიდენტი ენტონი ბანბერი პირველად საქართველოს ეწვია და იმ ქვეყნებს შორის სადაც IFES-ს წარმომადგენლობები აქვს გახსნილი, პრეზიდენტის რანგში პირველი შეხვედრა სწორედ საქართველოს ცესკოს თავმჯდომარესთან გამართა.

    სრულად
  • შეხვედრა ეუთო/ოდირის (OSCE/ODIHR) სადამკვირვებლო მისიის წარმომადგენლებთან

    შეხვედრა ეუთო/ოდირის (OSCE/ODIHR) სადამკვირვებლო მისიის წარმომადგენლებთან

    6 დეკემბერი, 2018

    ცესკოს ხელმძღვანელი პირები ეუთოს დემოკრატიული ინსტიტუტებისა და ადამიანის უფლებების ოფისის (OSCE/ODIHR) სადამკვირვებლო მისიის ხელმძღვანელს, გერტ-ჰაინრიხ არენს, მისიის ხელმძღვანელის მოადგილე მეგან ფიცჯერალდს და ანალიტიკოსებს (საარჩევნო და იურიდიულ საკითხებში) შეხვდნენ.

    მხარეებმა შეხვედრაზე საარჩევნო პროცესის შესახებ ისაუბრეს და განიხილეს ის მიმართულებები და საკითხები, რომელიც შესაძლოა მისიის საბოლოო ანგარიშში რეკომენდაციების სახით აისახოს. შეხვედრის მონაწილეებმა ასევე ისაუბრეს საარჩევნო პროცესში არსებულ გამოწვევებსა და მათი გადაჭრის გზებზე.

    ეუთო/ოდირის (OSCE/ODIHR) სადამკვირვებლო მისია საქართველოს პრეზიდენტის  არჩევნების როგორც პირველ, ასევე მეორე ტურს მთელი საქართველოს მასშტაბით აკვირდებოდა.

    სრულად
  • საქართველოს პრეზიდენტის არჩევნების წინასწარი შედეგები 3 702 საარჩევნო უბნის მიხედვით

    საქართველოს პრეზიდენტის არჩევნების წინასწარი შედეგები 3 702 საარჩევნო უბნის მიხედვით

    29 ნოემბერი, 2018

    ცენტრალური საარჩევნო კომისიის პრეს-სპიკერმა ანა მიქელაძემ საზოგადოებას საქართველოს პრეზიდენტის არჩევნების მეორე ტურის შედეგები 3 702 საარჩევნო უბნის მიხედვით გააცნო.

    „ამ დროისათვის, თითქმის ყველა, 3702 საარჩევნო უბნის მონაცემი დათვლილია და შემაჯამებელი ოქმები ხელმისაწვდომია ცესკოს ვებ-გვერდზე. ამ წუთებში მიმდინარეობს ხმის დათვლის პროცედურები ამერიკის შეერთებულ შტატებში გახსნილ 3 საარჩევნო უბანზე“, - განაცხადა ანა მიქელაძემ.

    საქართველოს პრეზიდენტის არჩევნების მეორე ტურის წინასწარ შედეგები შემდეგია:

    №5 გრიგოლ ვაშაძე - 40.46%, (779 614 ხმა)

    №48 სალომე ზურაბიშვილი - 59.54%, (1 147 106 ხმა)

     

    რაც შეეხება საზღვარგარეთ, მათ შორის ავღანეთში გახსნილი საარჩევნო უბნების წინასწარ შედეგებს, 57 უბნიდან დათვლილია 54 უბანი და საზღვარგარეთ მიღებული ხმები ასე გადანაწილდა:

    №5 გრიგოლ ვაშაძე - 64.27%, (5 216 ხმა)

    №48 სალომე ზურაბიშვილი - 35.73%, (2 900 ხმა)

     

    „აღსანიშნავია, რომ არჩევნების მეორე ტური გამოირჩეოდა ამომრჩეველთა მაღალი აქტივობით. ხმების დათვლის პროცესმა საარჩევნო უბნებზე ჩაიარა კანონის შესაბამისად.  საარჩევნო სუბიექტების წარმომადგენლებსა და დამკვირვებლებს შესაძლებლობა ჰქონდათ თავისუფლად დაკვირვებოდნენ ხმების დათვლის პროცესს. საუბნო შემაჯამებელი ოქმების შედგენისა და საარჩევნო უბანზე კანონით გათვალისწინებული ყველა პროცედურის დასრულების შემდეგ, ოქმები მიეწოდებოდა საოლქო საარჩევნო კომისიებს, რომლებიც თავის მხრივ, უმოკლეს ვადებში ტვირთავდნენ შემაჯამებელ ოქმებს სპეციალურ პროგრამაში. საღამოს, 22:00 საათისთვის უკვე დაწყებული იყო ცესკოს მიერ მიღებული ოქმების ვებ გვერდზე გამოქვეყნება. საარჩევნო ადმინისტრაციამ კენჭისყრის პროცესის დასრულებიდან  რამდენიმე საათში, კერძოდ კი 24:00 საათამდე გააცნო საზოგადოებას არჩევნების წინასწარი შედეგები 1181 უბნის მიხედვით. საუბნო შემაჯამებელი ოქმები მთელი ღამის განმავლობაში ოპერატიულად იტვირთებოდა  ცესკოს ვებგვერდზე და როგორც ოქმები, ისე განახლებული წინასწარი შედეგები ხელმისაწვდომი იყო ნებისმიერი დაინტერესებული პირისთვის“, - განაცხადა ცესკოს პრეს-სპიკერმა.

    ანა მიქელაძემ მედიას ასევე გააცნო ინფორმაცია საოლქო საარჩევნო კომისიებში შესული საჩივრების შესახებ. მისი თქმით ამ დროისათვის საოლქო საარჩევნო კომისიებში დაახლოებით 307 საჩივარია შესული. „საოლქო საარჩევნო კომისიებში შესული საჩივრების უმეტესობა, დღის განმავლობაში დაიწერა საარჩევნო უბნებზევე. საჩივრების  უმეტესი ნაწილი პროცედურულ ხარვეზებს ეხება და ძირითადი მოთხოვნა კომისიის წევრებისთვის დისციპლინური პასუხისმგებლობის ზომის დაკისრებაა. თუმცა, საოლქო საარჩევნო კომისიებში სხვა მოთხოვნის შემცველი საჩივრებიც შევიდა. არის ერთეული საჩივრები, რომლებიც უკავშირდება უბნის შედეგებს. ყველა საჩივარზე საარჩევნო კომისიებს ექნებათ შესაბამისი რეაგირება“, - აღნიშნა მიქელაძემ.

    ბრიფინგის ბოლოს, ცესკოს პრეს-სპიკერმა არჩევნებში ჩართულ ყველა მხარეს, ადგილობრივ და საერთაშორისო სადამკვირვებლო ორგანიზაციებს, მედიას და ამომრჩევლებს არჩევნებში აქტიური მონაწილეობისთვის მადლობა გადაუხადა.  

    სრულად
  • სამუშაო შეხვედრა  მოლდოვას რესპუბლიკაში

    სამუშაო შეხვედრა მოლდოვას რესპუბლიკაში

    29 ნოემბერი, 2018

    ცესკოს სამართლებრივი უზრუნველყოფის განყოფილების უფროსმა გიორგი კალანდარიშვილმა მოლდოვას რესპუბლიკაში, სამუშაო შეხვედრაში მიიღო მონაწილეობა. კიშინიოვში გამართულ შეხვედრაზე, რომლის თემაც საარჩევნო პროცესში ადმინისტრაციული რესურსების ბოროტად გამოყენების წინააღმდეგ ბრძოლა და თავიდან აცილება იყო, მონაწილეებმა საარჩევნო პროცესში ადმინისტრაციული რესურსის გამოყენების საერთაშორისო გამოცდილებაზე, პრობლემის თავიდან აცილების და გადაჭრის გზებზე იმსჯელეს.

    გიორგი კალანდარიშვილმა წარადგინა პრეზენტაცია საარჩევნო პროცესში ადმინისტრაციული რესურსის გამოყენებასთან დაკავშირებით, საქართველოში არსებულ პრაქტიკაზე. მან ყურადღება გაამახვილა იმ აქტივობებზე, რომელსაც საარჩევნო ადმინისტრაცია აღნიშნული საკითხის პრევენციის მიზნით ახორციელებს. ცესკოს სამართლებრივი უზრუნველყოფის განყოფილების უფროსმა შეხვედრის მონაწილეებს, ასევე მიაწოდა ინფორმაცია იმ საკანონმდებლო რეგულაციებზე, რომელიც ამ თვალსაზრისით საქართველოში მოქმედებს.

    სამუშაო შეხვედრა ევროპის საბჭოსა და ვენეციის კომისიის მიერ, მოლდოვას რესპუბლიკის ცენტრალურ საარჩევნო კომისიასთან თანამშრომლობით იყო ორგანიზებული. ღონისძიებაში მონაწილეობდნენ მოლდოვას რესპუბლიკის საარჩევნო ადმინისტრაციის ხელმძღვანელი პირები, სამოქალაქო სექტორის და პოლიტიკური პარტიების წარმომადგენლები, ასევე საარჩევნო საკითხებზე მომუშავე ექსპერტები ევროსაბჭოს ვენეციის კომისიიდან და ევროსაბჭოს რეგიონული ხელისუფლებების კონგრესიდან.

    სრულად

სიახლე