A
A A A
a A

სიახლეები ყველა სიახლე

  • შეხვედრა საარჩევნო სისტემების საერთაშორისო ფონდის (IFES) პრეზიდენტთან

    შეხვედრა საარჩევნო სისტემების საერთაშორისო ფონდის (IFES) პრეზიდენტთან

    7 დეკემბერი, 2018

    ცენტრალური საარჩევნო კომისიის (ცესკო) თავმჯდომარე თამარ ჟვანია საარჩევნო სისტემების საერთაშორისო ფონდის (IFES) ახლად არჩეულ პრეზიდენტ ენტონი ბანბერის შეხვდა. შეხვედრა ცესკოში გაიმართა და მას ცესკოს პრეს-სპიკერი ანა მიქელაძე, IFES-ის პროექტის ხელმძღვანელი ქეთი მაისურაძე და IFES-ის ევროპისა და ევრაზიის პროგრამის ოფიცერი ქეთი შუბითიძე დაესწრნენ.

    შეხვედრაზე მხარეებმა საქართველოში მიმდინარე საარჩევნო პროცესების შესახებ ისაუბრეს. IFES-ის პრეზიდენტმა საარჩევნო ადმინისტრაციის საქმიანობა დადებითად შეაფასა და აღნიშნა, რომ არჩევნების ადმინისტრირების მიმართულებით საარჩევნო ადმინისტრაციის წარმატება ცალსახაა. მისივე თქმით, ბოლო წლების განმავლობაში საქართველოს საარჩევნო ადმინისტრაცია მნიშვნელოვნად განვითარდა.

    საარჩევნო სისტემების საერთაშორისო ფონდის პრეზიდენტი ენტონი ბანბერი პირველად საქართველოს ეწვია და იმ ქვეყნებს შორის სადაც IFES-ს წარმომადგენლობები აქვს გახსნილი, პრეზიდენტის რანგში პირველი შეხვედრა სწორედ საქართველოს ცესკოს თავმჯდომარესთან გამართა.

    სრულად
  • შეხვედრა ეუთო/ოდირის (OSCE/ODIHR) სადამკვირვებლო მისიის წარმომადგენლებთან

    შეხვედრა ეუთო/ოდირის (OSCE/ODIHR) სადამკვირვებლო მისიის წარმომადგენლებთან

    6 დეკემბერი, 2018

    ცესკოს ხელმძღვანელი პირები ეუთოს დემოკრატიული ინსტიტუტებისა და ადამიანის უფლებების ოფისის (OSCE/ODIHR) სადამკვირვებლო მისიის ხელმძღვანელს, გერტ-ჰაინრიხ არენს, მისიის ხელმძღვანელის მოადგილე მეგან ფიცჯერალდს და ანალიტიკოსებს (საარჩევნო და იურიდიულ საკითხებში) შეხვდნენ.

    მხარეებმა შეხვედრაზე საარჩევნო პროცესის შესახებ ისაუბრეს და განიხილეს ის მიმართულებები და საკითხები, რომელიც შესაძლოა მისიის საბოლოო ანგარიშში რეკომენდაციების სახით აისახოს. შეხვედრის მონაწილეებმა ასევე ისაუბრეს საარჩევნო პროცესში არსებულ გამოწვევებსა და მათი გადაჭრის გზებზე.

    ეუთო/ოდირის (OSCE/ODIHR) სადამკვირვებლო მისია საქართველოს პრეზიდენტის  არჩევნების როგორც პირველ, ასევე მეორე ტურს მთელი საქართველოს მასშტაბით აკვირდებოდა.

    სრულად
  • საქართველოს პრეზიდენტის არჩევნების წინასწარი შედეგები 3 702 საარჩევნო უბნის მიხედვით

    საქართველოს პრეზიდენტის არჩევნების წინასწარი შედეგები 3 702 საარჩევნო უბნის მიხედვით

    29 ნოემბერი, 2018

    ცენტრალური საარჩევნო კომისიის პრეს-სპიკერმა ანა მიქელაძემ საზოგადოებას საქართველოს პრეზიდენტის არჩევნების მეორე ტურის შედეგები 3 702 საარჩევნო უბნის მიხედვით გააცნო.

    „ამ დროისათვის, თითქმის ყველა, 3702 საარჩევნო უბნის მონაცემი დათვლილია და შემაჯამებელი ოქმები ხელმისაწვდომია ცესკოს ვებ-გვერდზე. ამ წუთებში მიმდინარეობს ხმის დათვლის პროცედურები ამერიკის შეერთებულ შტატებში გახსნილ 3 საარჩევნო უბანზე“, - განაცხადა ანა მიქელაძემ.

    საქართველოს პრეზიდენტის არჩევნების მეორე ტურის წინასწარ შედეგები შემდეგია:

    №5 გრიგოლ ვაშაძე -    40.46%, (779 614 ხმა)

    №48 სალომე ზურაბიშვილი      59.54%, (1 147 106  ხმა)

     

    რაც შეეხება საზღვარგარეთ, მათ შორის ავღანეთში გახსნილი საარჩევნო უბნების წინასწარ შედეგებს, 57 უბნიდან დათვლილია 54 უბანი და საზღვარგარეთ მიღებული ხმები ასე გადანაწილდა:

    №5 გრიგოლ ვაშაძე - 64. 27 %,  (5 216 ხმა)

    №48 სალომე ზურაბიშვილი  35.73%, (2 900 ხმა)

     

    „აღსანიშნავია, რომ არჩევნების მეორე ტური გამოირჩეოდა ამომრჩეველთა მაღალი აქტივობით. ხმების დათვლის პროცესმა საარჩევნო უბნებზე ჩაიარა კანონის შესაბამისად.  საარჩევნო სუბიექტების წარმომადგენლებსა და დამკვირვებლებს შესაძლებლობა ჰქონდათ თავისუფლად დაკვირვებოდნენ ხმების დათვლის პროცესს. საუბნო შემაჯამებელი ოქმების შედგენისა და საარჩევნო უბანზე კანონით გათვალისწინებული ყველა პროცედურის დასრულების შემდეგ, ოქმები მიეწოდებოდა საოლქო საარჩევნო კომისიებს, რომლებიც თავის მხრივ, უმოკლეს ვადებში ტვირთავდნენ შემაჯამებელ ოქმებს სპეციალურ პროგრამაში. საღამოს, 22:00 საათისთვის უკვე დაწყებული იყო ცესკოს მიერ მიღებული ოქმების ვებ გვერდზე გამოქვეყნება. საარჩევნო ადმინისტრაციამ კენჭისყრის პროცესის დასრულებიდან  რამდენიმე საათში, კერძოდ კი 24:00 საათამდე გააცნო საზოგადოებას არჩევნების წინასწარი შედეგები 1181 უბნის მიხედვით. საუბნო შემაჯამებელი ოქმები მთელი ღამის განმავლობაში ოპერატიულად იტვირთებოდა  ცესკოს ვებგვერდზე და როგორც ოქმები, ისე განახლებული წინასწარი შედეგები ხელმისაწვდომი იყო ნებისმიერი დაინტერესებული პირისთვის“, - განაცხადა ცესკოს პრეს-სპიკერმა.

    ანა მიქელაძემ მედიას ასევე  გააცნო ინფორმაცია საოლქო საარჩევნო კომისიებში შესული საჩივრების შესახებ. მისი თქმით ამ დროისათვის საოლქო საარჩევნო კომისიებში დაახლოებით  307 საჩივარია შესული. „საოლქო საარჩევნო კომისიებში შესული საჩივრების უმეტესობა, დღის განმავლობაში დაიწერა საარჩევნო უბნებზევე. საჩივრების  უმეტესი ნაწილი პროცედურულ ხარვეზებს ეხება და ძირითადი მოთხოვნა კომისიის წევრებისთვის დისციპლინური პასუხისმგებლობის ზომის დაკისრებაა. თუმცა, საოლქო საარჩევნო კომისიებში სხვა მოთხოვნის შემცველი საჩივრებიც შევიდა. არის ერთეული საჩივრები, რომლებიც უკავშირდება უბნის შედეგებს. ყველა საჩივარზე საარჩევნო კომისიებს ექნებათ შესაბამისი რეაგირება“, - აღნიშნა მიქელაძემ.

    ბრიფინგის ბოლოს, ცესკოს პრეს-სპიკერმა არჩევნებში ჩართულ ყველა მხარეს, ადგილობრივ და საერთაშორისო სადამკვირვებლო ორგანიზაციებს, მედიას და ამომრჩევლებს არჩევნებში აქტიური მონაწილეობისთვის მადლობა გადაუხადა.  

    სრულად
  • სამუშაო შეხვედრა  მოლდოვას რესპუბლიკაში

    სამუშაო შეხვედრა მოლდოვას რესპუბლიკაში

    29 ნოემბერი, 2018

    ცესკოს სამართლებრივი უზრუნველყოფის განყოფილების უფროსმა გიორგი კალანდარიშვილმა მოლდოვას რესპუბლიკაში, სამუშაო შეხვედრაში მიიღო მონაწილეობა. კიშინიოვში გამართულ შეხვედრაზე, რომლის თემაც საარჩევნო პროცესში ადმინისტრაციული რესურსების ბოროტად გამოყენების წინააღმდეგ ბრძოლა და თავიდან აცილება იყო, მონაწილეებმა საარჩევნო პროცესში ადმინისტრაციული რესურსის გამოყენების საერთაშორისო გამოცდილებაზე, პრობლემის თავიდან აცილების და გადაჭრის გზებზე იმსჯელეს.

    გიორგი კალანდარიშვილმა წარადგინა პრეზენტაცია საარჩევნო პროცესში ადმინისტრაციული რესურსის გამოყენებასთან დაკავშირებით, საქართველოში არსებულ პრაქტიკაზე. მან ყურადღება გაამახვილა იმ აქტივობებზე, რომელსაც საარჩევნო ადმინისტრაცია აღნიშნული საკითხის პრევენციის მიზნით ახორციელებს. ცესკოს სამართლებრივი უზრუნველყოფის განყოფილების უფროსმა შეხვედრის მონაწილეებს, ასევე მიაწოდა ინფორმაცია იმ საკანონმდებლო რეგულაციებზე, რომელიც ამ თვალსაზრისით საქართველოში მოქმედებს.

    სამუშაო შეხვედრა ევროპის საბჭოსა და ვენეციის კომისიის მიერ, მოლდოვას რესპუბლიკის ცენტრალურ საარჩევნო კომისიასთან თანამშრომლობით იყო ორგანიზებული. ღონისძიებაში მონაწილეობდნენ მოლდოვას რესპუბლიკის საარჩევნო ადმინისტრაციის ხელმძღვანელი პირები, სამოქალაქო სექტორის და პოლიტიკური პარტიების წარმომადგენლები, ასევე საარჩევნო საკითხებზე მომუშავე ექსპერტები ევროსაბჭოს ვენეციის კომისიიდან და ევროსაბჭოს რეგიონული ხელისუფლებების კონგრესიდან.

    სრულად
  • საქართველოს პრეზიდენტის არჩევნების წინასწარი შედეგები 1181 დათვლილი საარჩევნო უბნის მიხედვით

    საქართველოს პრეზიდენტის არჩევნების წინასწარი შედეგები 1181 დათვლილი საარჩევნო უბნის მიხედვით

    29 ნოემბერი, 2018

    ცენტრალური საარჩევნო კომისიის თავმჯდომარე თამარ ჟვანიამ საზოგადოებას საქართველოს პრეზიდენტის არჩევნების მეორე ტურის წინასწარი შედეგები გააცნო. მან შედეგები 1181 (32%) დათვლილი საარჩევნო უბნის მიხედვით წარადგინა.

    თამარ ჟვანიას განცხადებით წინასწარი შედეგები შემდეგია:

    №5 გრიგოლ ვაშაძე - 195 305 ხმა (43%)

    №48 სალომე ზურაბიშვილი - 262 826 ხმა (57%)

    „პირველ რიგში ძალიან დიდი მადლობა მინდა გადავუხადო საქართველოს ამომრჩევლებს, თითოეულ მათგანს, ვინც მივიდა და აქტიურად მიიღო მონაწილეობა არჩევნებში. ეს გახლდათ ძალიან მაღალი აქტივობა, თითქმის ორ მილიონამდე ამომრჩეველი იყო მზად, რომ დღეს დაეფიქსირებინა საკუთარი ნება. ასევე მინდა მადლობა გადავუხადო საარჩევნო პროცესის მონაწილე ყველა მხარეს, ჩართულ მხარეებს, ადგილობრივ და საერთაშორისო სადამკვირვებლო ორგანიზაციებს, რომლებმაც ძალიან აქტიურად იმუშავეს იმისთვის რომ პროცესის გამჭვირვალობისთვის შეეწყოთ ხელი, მათ მთელი დღის განმავლობაში ასევე მთლიანად პროცესს გაუწიეს მხარდაჭერა. მინდა მადლიერება გამოვხატო მედიაწარმომადგენლების მიმართ, რომლებიც დაუღალავად მუშაობდნენ მთელი დღის განმავლობაში. და რა თქმა უნდა, საარჩევნო ადმინისტრაციას, თითოეულ წევრს, მინდა გადავუხადო ძალიან დიდი მადლობა იმ დიდი შრომისთვის, რომელიც მათ გასწიეს და რომელიც ჯერ კიდევ მიმდინარეობს“,-განაცხადა თამარ ჟვანიამ.

    როგორც ცესკოს თავმჯდომარემ აღნიშნა, ყველა მედიასაშუალებას, საზოგადოებას, ლაივ რეჟიმში ექნება შესაძლებლობა მუდმივად განახლებადი წინასწარი შედეგების შესახებ ინფორმაცია მიიღოს ცენტრალური საარჩევნო კომისიიდან.

    „ჯერ კიდევ საოლქო საარჩევნო კომისიებში გრძელდება ოქმების შემოსვლა. როგორც მოგეხსენებათ ოქმების ატვირთვა ხდება მხოლოდ უბნების მიერ ყველა პროცედურის დასრულების შემდგომ. საოლქო საარჩევნო კომისიაში მიტანის შემდეგ ოფიციალური ოქმების სისტემაში შემოსვლის შედეგად ხდება ოფიციალური წინასწარი შედეგების დათვლა, თუმცა არის რამდენიმე უბანი, რომელზეც ჯერ კიდევ პროცესი დასასრულებელია და კიდევ ველოდებით ოქმების შემოსვლას, შესაბამისად, სავარაუდოდ მთელი ღამის განმავლობაში გვექნება განახლებადი შედეგები ლაივ რეჟიმში, და თქვენ  გექნებათ შესაძლებლობა, მიიღოთ ინფორმაცია ეტაპობრივად წინასწარი შედეგების შესახებ“, - განუცხადა მედიას ცესკოს თავმჯდომარემ.

    მან, დღესვე საოლქო საარჩევნო კომისიებში შესულ საჩივრებზეც ისაუბრა. თამარ ჟვანიას თქმით, ამ ეტაპზე საჩივრების რაოდენობა 289-ს შეადგენს.

    „საჩივრების შეტანას აქვს წესი. ოქმის შედგენიდან ორი დღის განმავლობაში ისინი შეიძლება წარდგენილ იქნას საოლქო საარჩევნო კომისიებში, საოლქო საარჩევნო კომისიები მას იხილავენ ორი დღის ვადაში. საარჩევნო ადმინისტრაცია მთელი დღის განმავლობაში იყო მზად მოეხდინა რეაგირება ნებისმიერ, პროცედურული ხასიათისა და თუ სხვა ტიპის, ხარვეზზე. საჩივრები, რომლებსაც ექნება არსებითი საფუძვლები, და არა მხოლოდ ისინი - ყველა მათგანი იქნება განხილული და გვექნება შესაბამისი გადაწყვეტილებები მიღებული კანონით დადგენილ ვადაში“, - განაცხადა ცესკოს თავმჯდომარემ ბრიფინგის ბოლოს.

    სრულად
  • კენჭისყრის პროცესი დასრულდა

    კენჭისყრის პროცესი დასრულდა

    28 ნოემბერი, 2018

    ცენტრალურ საარჩევნო კომისიაში კენჭისყრის პროცესის დასრულების შესახებ საინფორმაციო ბრიფინგი გაიმართა. როგორც ბრიფინგზე ცესკოს პრეს-სპიკერმა ანა მიქელაძემ განაცხადა, 20:00 საათზე ყველა საარჩევნო უბანი კანონის შესაბამისად დაიხურა.

    „კენჭისყრაში მონაწილეობა მიიღო 1 975 845-მა ამომრჩეველმა,  რაც საერთო რაოდენობის 56.23%-ია. ამ რაოდენობაში არ შედის საზღვარგარეთ არჩევნებში მონაწილე ამომრჩევლების რაოდენობა. ყველაზე მაღალი აქტივობა დაფიქსირდა ქედაში - 72.72%, ხოლო ყველაზე დაბალი აქტივობა წალკაში - 43.12%. რაც შეეხება თბილისს, 20:00 საათის მდგომარეობით ამომრჩეველთა აქტივობამ შეადგინა 55.9%. ამომრჩეველთა აქტივობამ პრეზიდენტის არჩევნების პირველ ტურში, 20:00  საათისთვის 46.74%, (1 637 956 ამომრჩეველი) იყო. არჩევნების მეორე ტური  ამომრჩეველთა მაღალი აქტივობით გამოირჩეოდა. კენჭისყრის პროცესმა მთელს ქვეყანაში მშვიდად და განსაკუთრებული დარღვევების გარეშე ჩაიარა. იყო გარკვეული ტიპის ხარვეზები, რომლებზეც, უმრავლეს შემთხვევაში, ადმინისტრაციას საარჩევნო უბნებზევე ჰქონდა რეაგირება“,- განაცხადა ანა მიქელაძემ. მისი თქმით, დღეს, ცესკოს სატელეფონო-საინფორმაციო ცენტრი მუშაობს უწყვეტ რეჟიმში. მთელი დღის მანძილზე შემოვიდა 1 739 ზარი და 522 შეტყობინება ონლაინ ჩატის მეშვეობით. მათი დიდი ნაწილი ამომრჩევლების მიერ სიაში მონაცემების გადამოწმებას, საარჩევნო უბნის მისამართებისა და საარჩევნო პროცედურების დაზუსტებას შეეხებოდა.

    კენჭისყრის პროცესის დასრულების შემდეგ დაიწყო ხმის დათვლის პროცედურები. საარჩევნო უბანზე ყველა ოფიციალური პროცედურის დასრულების შემდეგ, საუბნო შემაჯამებელი ოქმები მიეწოდება  შესაბამის საოლქო საარჩევნო კომისიებს. თავის მხრივ, საოლქო საარჩევნო კომისიები სპეციალური პროგრამის საშუალებით, უმოკლეს ვადაში, ელექტრონულად მოაწვდიან ცესკოს და შემაჯამებელი ოქმები მიღებისთანავე ეტაპობრივად აიტვირთება სპეციალურ ვებ-გვერდზე - www.results.cec.gov.ge.

    „როგორც მოგეხსენებათ, საარჩევნო უბანზე მყოფი საარჩევნო სუბიექტების წარმომადგენლები და დამკვირვებლები  ინფორმაციას შედეგების შესახებ საარჩევნო უბნებიდანვე სხვადასხვა საშუალებებით ავრცელებენ. თუმცა, ცენტრალური საარჩევნო კომისია, როგორც ადმინისტრაციული ორგანო, ვალდებულია დაელოდოს საუბნო საარჩევნო კომისიების ოფიციალურ მონაცემებს და მხოლოდ ოფიციალური შემაჯამებელი ოქმების საფუძველზე დათვლილ პირველად, წინასწარ შედეგებს გავაცნობთ საზოგადოებას“, - აღნიშნა პრეს-სპიკერმა.

    მისივე თქმით, საარჩევნო პროცესების გამჭვირვალობის ხელშეწყობის მიზნით, ცენტრალური საარჩევნო კომისია ნებისმიერ მსურველს შესაძლებლობას აძლევს ონლაინ დააკვირდეს ცესკოში არჩევნების წინასწარი შედეგების შეჯამების პროცესს ინტერნეტ ტრანსლირების საშუალებით. ტრანსლაცია 360 გრადუსიანი ტექნოლოგიის გამოყენებით ცესკოს „ფეისბუქზე“ (Facebook), „იუთუბსა“ (Youtube) და ვებგვერდზე მოხდება.

    „საერთო ჯამში ყველა საოლქო საარჩევნო კომისიაში შესულია 261 საჩივარი. საჩივრები დაიწერა ადგილობრივი დამკვირვებელი ორგანიზაციებისა და საარჩევნო სუბიექტების წარმომადგენელთა მიერ. საოლქო საარჩევნო კომისიებში  შეტანილი საჩივრების უმეტესობის ძირითადი მოთხოვნა კომისიის წევრებისათვის დისციპლინური პასუხისმგებლობის დაკისრებაა. ასევე, ერთეულ შემთხვევებში, საარჩევნო უბანზე კენჭისყრის შედეგების გაბათილება. ყველა საჩივარს საარჩევნო ადმინისტრაცია განიხილავს კანონით დადგენილი წესითა და ვადებით. აქვე შეგახსენებთ, რომ ამ წუთებში მიმდინარეობს ავღანეთის 2 საარჩევნო უბნის ხმის დათვლის პროცედურები. შედეგები შემაჯამებელი ოქმების შედგენისთანავე ხელმისაწვდომი იქნება ცესკოს ვებ-გვერდზე. საარჩევნო ადმინისტრაცია კიდევ ერთხელ მოუწოდებს არჩევნებში ჩართულ ყველა მხარეს ხელი შეუწყონ საარჩევნო ადმინისტრაციას, რათა კომისიების მიერ მშვიდ ვითარებაში, ზუსტად აისახოს თითოეული ამომრჩევლის ნება და არ შეფერხდეს ხმის დათვლის პროცესი. 22:00 საათისთვის შემოვა პირველადი ოქმები, 23:00 საათიდან ძირითადი ოქმები და სავარაუდოდ არაუგვიანეს ღამის 02:00 საათისა, ცესკო გამოაცხადებს არჩევნების პირველად, წინასწარ შედეგებს“, - განაცხადა ანა მიქელაძემ.

    ამომრჩეველთა აქტივობა 20:00 სთ-ის მდგომარეობით

     

    სრულად

სიახლე