A
A A A
a A

სიახლეები ყველა სიახლე

  • ინფორმაცია საუბნო საარჩევნო კომისიების პირველი სხდომების დისკრედიტაციის მცდელობასთან დაკავშირებით

    ინფორმაცია საუბნო საარჩევნო კომისიების პირველი სხდომების დისკრედიტაციის მცდელობასთან დაკავშირებით

    20 სექტემბერი, 2017

    ცენტრალური საარჩევნო კომისიისთვის ცნობილი გახდა, რომ დღეს დილიდან, დაფარული ნომრით უცნობმა პირმა დარეკა ბათუმის ოლქში შემავალი საუბნო საარჩევნო კომისიის წევრთან და მიაწოდა მცდარი ინფორმაცია, თითქოს საუბნო საარჩევნო კომისიის პირველი სხდომა გადაიდო. აღნიშნული ქმედება შესაძლოა წარმოადგენდეს  საუბნო სარჩევნო კომისიის პირველი სხდომის ჩატარების ხელშეშლის მცდელობას.

    შესაბამისად, გვინდა მივმართოთ საარჩევნო ადმინისტრაციის წევრებს, ნუ დაეყრდნობიან უცნობი პირების მიერ მიწოდებულ ინფორმაციას, კომუნიკაცია იქონიონ მხოლოდ ზემდგომ საარჩევნო ადმინისტრაციასთან და მიიღონ მონაწილეობა დაგეგმილ საქმიანობაში.

    ამასთან, საზოგადოებისთვის განსაკუთრებით საყურადღებო და ხაზგასმით აღსანიშნავია ფაქტები, რომლებიც დღეს დილით დაფიქსირდა თბილისის, რუსთავის და სხვა საარჩევნო ოლქებში შემავალ საუბნო საარჩევნო კომისიებში, სადაც ტარდება საუბნო საარჩევნო კომისიების პირველი სხდომები. კონკრეტული პოლიტიკური სუბიექტის მიერ ნომინირებული კომისიის წევრები სხდომაზე გამოცხადდნენ პროცესის დაწყებამდე წინასწარ გამზადებული წერილითა და ტექსტით, რომელიც შეიცავს განსხვავებულ აზრს და უარყოფით მოსაზრებებს საუბნო საარჩევნო კომისიის ხელმძღვანელი პირების არჩევის შედეგების შესახებ.

    სხდომების დაწყებამდე, ერთი და იგივე სუბიექტის წარმომადგენლების მიერ წინასწარ გამზადებული იდენტური ტექსტით პროცესის ნეგატიურად შეფასება, იმის მიუხედავად, თუ ვინ იქნება შემდგომში არჩეული, განიხილება პროცესის დისკრედიტაციისთვის გამიზნულ წინასწარ დაგეგმილ ქმედებად.

    ჩვენ ხელთ გვაქვს აღნიშნული ფაქტების მტკიცებულებები, რომლებიც მოგვეწოდა სხდომების დაწყებამდე.

    შესაბამისად, გვინდა კიდევ ერთხელ მივმართოთ საარჩევნო სუბიექტებს, ნუ მიაყენებენ ზიანს საარჩევნო პროცესს კონკრეტული ინტერესების გამო და ხელი შეუწყონ საარჩევნო ადმინისტრაციის კანონიერ საქმიანობას. ამასთან, მივმართავთ დამკვირვებლებს, აქტიურად მიიღონ მონაწილეობა საარჩევნო ადმინისტრაციის  საქმიანობის მონიტორინგში და მიუკერძოებლად ასახონ მიმდინარე ფაქტები და პროცესები.

    სრულად
  • ცესკოსა და შსს-ს შორის ურთიერთთანამშრომლობის მემორანდუმი გაფორმდა

    ცესკოსა და შსს-ს შორის ურთიერთთანამშრომლობის მემორანდუმი გაფორმდა

    19 სექტემბერი, 2017

    ცენტრალური საარჩევნო კომისიის თავმჯდომარე თამარ ჟვანიამ და შინაგან საქმეთა მინისტრმა გიორგი მღებრიშვილმა დღეს ურთიერთთანამშრომლობის მემორანდუმს მოაწერეს ხელი.

    მემორანდუმის მიზანია, ხელი შეუწყოს 2017 წლის ოქტომბერში გასამართი ადგილობრივი თვითმმართველობის წარმომადგენლობითი და აღმასრულებელი ორგანოების არჩევნების უსაფრთხო და მშვიდ გარემოში ჩატარებას. როგორც თამარ ჟვანიამ აღნიშნა, უსაფრთხო საარჩევნო გარემო - ის პრიორიტეტი და აღიარებული საერთაშორისო სტანდარტია, რომლის უზრუნველყოფაც აუცილებელია არჩევნების მაღალ დონეზე ორგანიზებისთვის.

    „მშვიდობიანი და თავისუფალი საარჩევნო გარემოს უმნიშვნელოვანესი საფუძველია უსაფრთხოების უზრუნველყოფა. სწორედ ამიტომ, საარჩევნო სისტემების საერთაშორისო ფონდის (IFES) ხელშეწყობით, ცესკოსა და შინაგან საქმეთა სამინისტროს თანამშრომლობით, არაერთი მნიშვნელოვანი ნაბიჯი გადაიდგა იმისათვის, რომ ამ მიმართულებით უფრო ეფექტური მომსახურება გაგვეწია ამომრჩევლებისთვის. ჩვენ კარგად გვესმის, რომ არჩევნების უსაფრთხოება უნდა იყოს უზრუნველყოფილი ყველა დონეზე, აკმაყოფილებდეს მაღალ პროფესიულ სტანდარტებს და ამავდროულად, გათვალისწინებული უნდა იყოს თითოეული ასპექტი და არსებული გამოცდილება. დღეს აქ სწორედ იმისათვის შევიკრიბეთ, რომ მემორანდუმის გაფორმებით კიდევ ერთხელ გავუსვათ ხაზი ამ პრიორიტეტის მნიშვნელობას ადგილობრივი თვითმმართველობის არჩევნებისთვის. ჩვენ ყველამ კარგად დავინახეთ, რომ საკითხისადმი სისტემური, პროფესიული მიდგომა და მკვეთრად გამიჯნული ფუნქციები უწყებებს შორის იყო შედეგის მომტანი. დღეს ამ დოკუმენტზე ხელმოწერით კიდევ ერთხელ საჯაროდ ვადასტურებთ ჩვენს სრულ მზაობას უზრუნველვყოთ ყველასათვის საარჩევნო უფლების თავისუფლად განხორციელება  და უსაფრთხო საარჩევნო გარემო“,-აღნიშნა თამარ ჟვანიამ.

    დოკუმენტი არჩევნების დღეს ხმის მიცემის პროცესის მშვიდ და თავისუფალ გარემოში ჩატარების უზრუნველსაყოფად მხარეთა თანამშრომლობას, ასევე ერთობლივი ტრენინგებისა და სამუშაო შეხვედრების ორგანიზებას ითვალისწინებს და ამ სამუშაო პროცესს მხარდაჭერას უწევს  საარჩევნო სისტემების საერთაშორისო ფონდი (IFES).

    „არჩევნების მაღალ დონეზე, დასავლური სტანდარტების შესაბამისად ორგანიზებისთვის უმთავრესი პირობაა საარჩევნო კანონის მაქსიმალურად დაცვა, შესაბამისი უწყებების კოორდინირებული მუშაობა და უსაფრთხო საარჩევნო გარემოს შექმნა. მიმაჩნია, რომ შინაგან საქმეთა სამინისტროსა და ცესკოს შორის თანამშრომლობის სწორად დაგეგმვა და წარმართვა იქნება წინაპირობა იმისა, რომ 2017 წლის ოქტომბერში დაგეგმილი ადგილობრივი თვითმმართველობის წარმომადგენლობითი და აღმასრულებელი ორგანოების არჩევნები მშვიდ, უსაფრთხო და თავისუფალ გარემოში ჩატარდეს“, - განაცხადა შინაგან საქმეთა მინისტრმა გიორგი მღებრიშვილმა.

    აღსანიშნავია, რომ საარჩევნო ადმინისტრაციასა და შინაგან საქმეთა სამინისტროს შორის ურთიერთგაგების მემორანდუმი პირველად გასულ წელს გაფორმდა, რომლის საფუძველზეც მხარეებმა 2016 წლის პარლამენტის არჩევნების უსაფრთხოების უზრუნველყოფის მიმართულებით ერთობლივი ღონისძიებები, მათ შორის ტრენინგები და სამუშაო შეხვედრებიც გამართეს.

    სრულად
  • შეხვედრა ევროპარლამენტის ექსპერტთან

    შეხვედრა ევროპარლამენტის ექსპერტთან

    18 სექტემბერი, 2017

    ცესკოს იურიდიული დეპარტამენტის უფროსი  არჩილ ანასაშვილი და ცესკოს სამართლებრივი უზრუნველყოფის განყოფილების უფროსი  გიორგი კალანდარიშვილი ევროპარლამენტის ექსპერტს ჰოლი რუთროფს შეხვდნენ. შეხვედრაზე საარჩევნო კოდექსში განხორციელებული ცვლილებები განიხილეს; ასევე ისაუბრეს საარჩევნო ადმინისტრაციის უფლებამოსილებაზე დადგენილებების გამოცემასთან დაკავშირებით. ცესკოს წარმომადგენლებმა ექსპერტს იურიდიული დეპარტამენტის მიერ ჩატარებული იმ ტრენინგებისა და შეხვედრების შესახებაც მიაწოდეს ინფორმაცია, რომლებიც მიზნად ისახავს საოლქო საარჩევნო კომისიების კვალიფიკაციის ამაღლებას საარჩევნო დავების განხილვასთან დაკავშირებით.

    სრულად
  • საოლქო საარჩევნო კომისიის წევრთა I ეტაპის ტრენინგების სტატისტიკა 2017 წლის 21 ოქტომბრის არჩევნებისთვის

    საოლქო საარჩევნო კომისიის წევრთა I ეტაპის ტრენინგების სტატისტიკა 2017 წლის 21 ოქტომბრის არჩევნებისთვის

    17 სექტემბერი, 2017

    მუნიციპალიტეტის წარმომადგენლობითი ორგანოს - საკრებულოსა და თვითმმართველი ქალაქის/თემის მერის  2017 წლის 21 ოქტომბრის არჩევნებისთვის შემუშავებული ტრენინგების კონცეფციის შესაბამისად განხორციელდა საოლქო საარჩევნო კომისიების წევრთა ტრენინგების I ეტაპი, რომელიც დაეთმო საოლქო საარჩევნო კომისიების სრული შემადგენლობის სწავლებას და განხილულ იქნა შემდეგი სასწავლო მოდულები:

    • საოლქო საარჩევნო კომისიის საქმიანობა წინასაარჩევნო პერიოდში;
    • საუბნო საარჩევნო კომისიის პირველი სხდომა და ხელმძღვანელ პირთა არჩევის წესი (პირველი სხდომის ინსტრუქცია (ეპიზოდური ინსცენირება));
    • საარჩევნო პროცესში მონაწილე პირთა რეგისტრაცია;
    • საოლქო საარჩევნო კომისიაში კენჭისყრისა და არჩევნების შედეგების შეჯამება;
    • საოლქო საარჩევნო კომისიაში განცხადებების/საჩივრების შეტანისა და განხილვის წესი.

    ტრენინგი გაიარა 73 საოლქო საარჩევნო კომისიის 896 წევრმა, მათ შორის კაცი - 329, ქალი - 567.

    დეტალური სტატისტიკა იხილეთ ბმულზე.

    სრულად
  • დისტანციური სასწავლო პროგრამა მუნიციპალიტეტის წარმომადგენლობითი ორგანოს - საკრებულოსა და თვითმმართველი ქალაქის/თვითმმართველი თემის მერის 2017 წლის 21 ოქტომბრის არჩევნებისთვის

    დისტანციური სასწავლო პროგრამა მუნიციპალიტეტის წარმომადგენლობითი ორგანოს - საკრებულოსა და თვითმმართველი ქალაქის/თვითმმართველი თემის მერის 2017 წლის 21 ოქტომბრის არჩევნებისთვის

    17 სექტემბერი, 2017

    არჩევნებში ჩართული მხარეების ინფორმირებისა და საარჩევნო ცნობიერების ამაღლების ხელშეწყობის მიზნით, მუნიციპალიტეტის წარმომადგენლობითი ორგანოს - საკრებულოსა და თვითმმართველი ქალაქის/თვითმმართველი თემის მერის 2017 წლის 21 ოქტომბრის არჩევნებისთვის ცესკოს სწავლების ცენტრმა შეიმუშავა დისტანციური სასწავლო პროგრამა, რომელიც დაინტერესებულ პირებს აძლევს შესაძლებლობას მიიღონ ინფორმაცია კენჭისყრის დღის პროცედურებისა და საუბნო საარჩევნო კომისიის მუშაობის წესის შესახებ. პროგრამაში ინტეგრირებულია ტესტური დავალებები, რომელიც მომხმარებელთათვის ქმნის ცოდნის გადამოწმების დამატებით რესურსს.

    დისტანციური სასწავლო პროგრამა იხილეთ ბმულზე

    სრულად
  • შეხვედრა არასამთავრობო ორგანიზაციებთან

    შეხვედრა არასამთავრობო ორგანიზაციებთან

    16 სექტემბერი, 2017

    16 სექტემბერს, სწავლების ცენტრმა არასამთავრობო ორგანიზაციებთან შემაჯამებელი შეხვედრა გამართა. ღონისძიებაზე დამსწრე ცხრამეტი არასამთავრობო ორგანიზაციის წარმომადგენლებმა საჯარო ანგარიში წარადგინეს 2017 წლის 3 თებერვალს გამოცხადებული საგრანტო კონკურსის ფარგლებში მათ მიერ განხორციელებულ საგრანტო პროექტებთან დაკაშირებით. სწავლების ცენტრის მიერ გამოცხადებულ კონკურსში გამარჯვებული საგრანტო პროექტები მიზნად ისახავდა პარტიების საარჩევნო შესაძლებლობების განვითარების ხელშეწყობას 2017 წლის 21 ოქტომბრის ადგილობრივი თვითმმართველობის არჩევნებისთვის.   

    ღონისძიება გახსნა სწავლების ცენტრის დირექტორმა ნათია ზაალიშვილმა, რომელმაც  საგრანტო კონკურსით განსაზღვრული მიმართულების მნიშვნელობასა და აქტუალობაზე ისაუბრა. შეხვედრის მონაწილეებმა წარმოადგინეს პრეზენტაციები განხორციელებული საგრანტო პროექტების შესახებ, წარმართული დისკუსიის ფარგლებში განიხილეს საგრანტო პროექტების შედეგები, გამოწვევები, დადებითი მხარეები და  გამოკვეთილი ინიციატივები.

    არასამთავრობო ორგანიზაციების წარმომადგენლებმა დადებითად შეაფასეს საგრანტო პროექტების ფარგლებში განხორციელებული სწავლების პროცესში სწავლების ცენტრის უშუალო ჩართულობა, რომელმაც კონტრიბუციის სახით უზრუნველყო პარტიების წარმომადგენლების სწავლება შემდეგ მოდულებზე: საარჩევნო ციკლი და საარჩევნო ოპერაციების მართვა (საარჩევნო ადმინისტრაციის მოდელი და უფლებამოსილებები); კენჭისყრის დღე და კენჭისყრის პროცესის სახელმძღვანელო პრინციპები; არჩევნების საანდოობა და უსაფრთხოება. ასევე აღინიშნა სწავლების ცენტრის მიერ  სასწავლო პროცესის მხარდაჭერის მნიშვნელობა სურდოთარგმანის თანხლებით.  

    აღნიშნული საინფორმაციო-საგანმანათლებლო პროგრამა გაიარა პროექტში მონაწილე 42 პოლიტიკური პარტიის, მათ შორის, 20 კვალიფიციური და 22 არაკვალიფიციური პარტიის 2276 წარმომადგენელმა (დეტალური სტატისტიკა იხილეთ ბმულზე).

    საკონკურსო თემატიკა - პოლიტიკური პარტიების საარჩევნო შესაძლებლობების განვითარების ხელშეწყობა 2017 წელს გასამართი ადგილობრივი თვითმმართველობის წარმომადგენლობითი და აღმასრულებელი ორგანოების არჩევნებისთვის

    • ააიპ ახალი თაობა-დემოკრატიული საქართველოსთვის - „განვითარებული პარტიები დედაქალაქის თვითმმართველობის არჩევნებისთვის“ იხ.პრეზენტაცია
    • ააიპ დემოკრატიულ ინიციატივათა საერთაშორისო ცენტრი - „ძლიერი პოლიტიკური პარტიები დედაქალაქის განვითარებისათვის“ იხ.პრეზენტაცია
    • ააიპ ჟურნალისტთა ასოციაცია - საზოგადოებრივი განვითარების კავშირი მეცენატი - „საარჩევნო შესაძლებლობების განვითარების ხელშეწყობა-თვითმმართველობის ლეგიტიმური არჩევნებისთვის“ იხ.პრეზენტაცია
    • ააიპ სამოქალაქო განვითარების საერთაშორისო ქსელი - „თვითმმართველობის პოლიტიკური არჩევნი“ იხ.პრეზენტაცია
    • ააიპ ინსტიტუციური განვითარების და მონიტორინგის ცენტრი - „ადგილობრივი თვითმმართველობის არჩევნების შესახებ ცნობიერების ამაღლება“ იხ.პრეზენტაცია
    • ააიპ მწვანე კავკასია - „პოლიტიკური პარტიების ადგილობრივი ორგანიზაციების წარმომადგენლების შესაძლებლობების გაზრდა ბოლნისის, დმანისის, თეთრიწყაროსა და წალკის საარჩევნო ოლქებში“ იხ.პრეზენტაცია
    • ააიპ ახალი სიტყვა - „ახალი სიტყვა თვითმმართველობის არჩევნებისთვის შიდა ქართლში“ იხ.პრეზენტაცია
    • ააიპ საზოგადოებრივი დამცველი - „ძლიერი პოლიტიკური პარტიები დემოკრატიული არჩევნებისთვის“ იხ.პრეზენტაცია
    • ააიპ თავისუფალი არჩევანი - „პოლიტიკური პარტიების გაძლიერება დემოკრატიული საარჩევნო პროცესებისათვის საქართველოში“ იხ.პრეზენტაცია
    • ააიპ კავშირი საერთო სამოქალაქო მოძრაობა მრავალეროვანი საქართველო - „კვალიფიციური და არაკვალიფიციური პოლიტიკური პარტიების წარმომადგენელთა საარჩევნო შესაძლებლობების განვითარების ხელშეწყობა სამცხე-ჯავახეთის რეგიონის ასპინძის, ახალქალაქისა და ნინოწმინდის საარჩევნო ოლქებში 2017 წელს გასამართი ადგილობრივი თვითმმართველობის წარმომადგენლობითი და აღმასრულებელი ორგანოების არჩევნებისთვის“ იხ.პრეზენტაცია
    • ააიპ ინფორმირებული საზოგადოება - „თვითმმართველობის როლი სახელმწიფოს განვითარებაში“ იხ.პრეზენტაცია
    • ააიპ სამოქალაქო ინიციატივა-სამართლიანი არჩევნები - „პოლიტიკური პარტიების საარჩევნო შესაძლებლობების განვითარების ხელშეწყობა“ იხ.პრეზენტაცია
    • ააიპ სამოქალაქო საზოგადოების და დემოკრატიის განვითარების ცენტრი - „პოლიტიკური პარტიების წევრების ტრენინგი-იმერეთი (სამტრედია, ვანი, ხონი, წყალტუბო)“ იხ.პრეზენტაცია
    • ააიპ სამოქალაქო ერთობა -„ ინფორმირებული რეგიონი“ იხ.პრეზენტაცია
    • ააიპ განვითარებისა და დემოკრატიის ცენტრი - „პოლიტიკური პარტიების რესურსების გაძლიერება დემოკრატიული პროცესების ხელშეწყობისათვის“ იხ.პრეზენტაცია
    • ააიპ ფოთის ახალგაზრდული ალიანსი - „პოლიტიკური პარტიებისთვის სასწავლო პროგრამების განხორციელება“ იხ.პრეზენტაცია
    • ააიპ საქართველოს კონსტიტუციურ-დემოკრატთა ასოციაცია - „ადგილობრივი თვითმმართველობის არჩევნები 2017: საქართველოს კანონმდებლობა - საარჩევნო სუბიექტები პრაქტიკაში“ იხ.პრეზენტაცია
    • ააიპ საქართველო მშვიდობისათვის - „თქვენ პროფესიონალიზმი -თვითმმართველობის არჩევნების გამჭირვალობისთვის“ იხ.პრეზენტაცია
    • ააიპ დემოკრატიული აჭარა - „თვითმმართველობის არჩევნები მაღალმთიან აჭარაში“ იხ.პრეზენტაცია

    ცესკო და სწავლების ცენტრი მომავალშიც აქტიურად გააგრძელებს ისეთი პროექტების მხარდაჭერას, რომლებიც ხელს შეუწყობს ამომრჩეველებისა და არჩევნებში ჩართული მხარეების ინფორმირებულობას და საარჩევნო კულტურის განვითარებას.

    სრულად
  • შეხვედრა ეუთოს დემოკრატიული ინსტიტუტების და ადამიანის უფლებათა ოფისის სადამკვირვებლო მისიასთან

    შეხვედრა ეუთოს დემოკრატიული ინსტიტუტების და ადამიანის უფლებათა ოფისის სადამკვირვებლო მისიასთან

    13 სექტემბერი, 2017

    ცენტრალური საარჩევნო კომისიის თავმჯდომარე ეუთოს დემოკრატიული ინსტიტუტების და ადამიანის უფლებათა ოფისის (OSCE/ODIHR) სადამკვირვებლო მისიის წარმომადგენლებს შეხვდა.

    თამარ ჟვანიამ დელეგაციის წევრებს ინფორმაცია მიაწოდა 21 ოქტომბრის არჩევნებისთვის მზადების პროცესის შესახებ. ცესკოს თავმჯდომარემ სხვადასხვა მნიშვნელოვან თემებზე გაამახვილა ყურადღება, მათ შორის ისაუბრა რეგისტრირებული საარჩევნო სუბიექტების, საარჩევნო ადმინისტრაციის მიერ განხორციელებული ტრენინგების და ინოვაციური სერვისების შესახებ, რასაც საარჩევნო ადმინისტრაცია ამომრჩევლებს და ჩართულ მხარეებს სთავაზობს. შეხვედრის მონაწილეებმა წინასაარჩევნო გარემოზეც იმსჯელეს.

    OSCE/ODIHR-მა საქართველოში სადამკვირვებლო მისიის განხორციელება დღეიდან დაიწყო. გრძელვადიანი მისია დააკვირდება როგორც წინასაარჩევნო პერიოდს, ასევე არჩევნების მიმდინარეობას. OSCE/ODIHR-ის გრძელვადიან მისიაში წარმოდგენილი იქნება სხვადასხვა ქვეყნის 22 დამკვირვებელი, ხოლო უშუალოდ არჩევნებს 350 მოკლევადიანი დამკვირვებელი დააკვირდება.

    სრულად
  • ტრენინგი საოლქო საარჩევნო კომისიებისთვის

    ტრენინგი საოლქო საარჩევნო კომისიებისთვის

    12 სექტემბერი, 2017

    საოლქო საარჩევნო კომისიების თავმჯდომარეებისა და მდივნებისთვის 7 დღის განმავლობაში საარჩევნო პროცესებთან დაკავშირებით ტრენინგი მიმდინარეობდა. 73 საოლქო საარჩევნო კომისიიდან 250-მდე მონაწილემ, ისეთი მნიშვნელოვანი საკითხების შესახებ მიიღო ინფორმაცია, როგორიც არის - საარჩევნო სუბიექტების მიერ ელექტრონული საშუალებებით წარმომადგენელთა დანიშვნის შესახებ განცხადებების წარდგენისა და რეგისტრაციის წესი და პირობები და არჩევნების შედეგების შეჯამება-რეკომენდაციები; სწავლების ფარგლებში, საოლქო საარჩევნო კომისიების ბუღალტრებმა ფინანსურ აღრიცხვაში შეტანილი ცვლილებების შესახებ მიიღეს ინფორმაცია.

    აღსანიშნავია, რომ ზემოაღნიშნული ელექტრონული პროგრამა, რომელიც პოლიტიკურ პარტიებს ელექტრონული საშუალებით რეგისტრაციის შესაძლებლობას აძლევს, წელს პირველად საპილოტე რეჟიმში ამოქმედდა და არჩევნებში ჩართულ მხარეებს უმარტივებს რეგისტრაციის პროცესს, ასევე საარჩევნო ადმინისტრაციას საშუალებას აძლევს დროულად და ეფექტურად დაამუშაოს, გადაამოწმოს წარდგენილი დოკუმენტაცია.

    სწავლებას ცესკოს სარეგისტრაციო და ადმინისტრაციული დეპარტამენტის ხელმძღვანელი ელისაბედ ველიძე, საარჩევნო პროცედურებისა და საოქმო შედეგების განყოფილების უფროსი მაია ფარქოსაძე და საფინანსო დეპარტამენტის თანამშრომელი ნათია ფოფხაძე უძღვებოდნენ. ტრენინგი 19 სექტემბერს დასრულდა. სწავლება ორგანიზებული იყო ცესკოს საარჩევნო პროცესების მართვის დეპარტამენტის მიერ.

    სრულად
  • „იპოვე შენი თავი - იპოვე შენი უბანი“

    „იპოვე შენი თავი - იპოვე შენი უბანი“

    12 სექტემბერი, 2017

    „იპოვე შენი თავი - იპოვე შენი უბანი“ - საზოგადოებრივი აქციის ფარგლებში უკვე მეოთხე დღეა ცესკოს და სწავლების ცენტრის თანამშრომლები მოქალაქეებს ხვდებიან; ისინი ამომრჩევლებს 2017 წლის 21 ოქტომბრის არჩევნების შესახებ აწვდიან ინფორმაციას და თანამედროვე ტექნოლოგიების გამოყენებით ამომრჩეველთა ერთიან სიაში საკუთარი მონაცემების გადამოწმებას სთავაზობენ.

    ამომრჩევლებს საკუთარი და ოჯახის წევრების მონაცემების გადამოწმება შეუძლიათ ცესკოს ვებგვერდის (voters.cec.gov.ge), მობილური ტელეფონის, პლანშეტისა და მთელი ქვეყნის მასშტაბით განთავსებული 9 500 სწრაფი გადახდის აპარატის მეშვეობით. ამომრჩეველთა სიაში მონაცემების გადამოწმებისას, მომხმარებელი ასევე მიიღებს ინფორმაციას, თუ რა მისამართზეა განთავსებული მისი საარჩევნო უბანი.

    შეგახსენებთ, რომ ამომრჩეველთა ერთიან სიაში ცვლილებების შეტანის მოთხოვნის ბოლო ვადა 3 ოქტომბერია.

    სრულად
  • ინფორმაცია 2017-2018 წლის შემოდგომის სემესტრში საქართველოს უმაღლესი საგანმანათლებლო დაწესებულებების სტუდენტებისათვის სასწავლო პროგრამის განხორციელების შესახებ

    ინფორმაცია 2017-2018 წლის შემოდგომის სემესტრში საქართველოს უმაღლესი საგანმანათლებლო დაწესებულებების სტუდენტებისათვის სასწავლო პროგრამის განხორციელების შესახებ

    12 სექტემბერი, 2017

    2017-2018 სასწავლო წლის შემოდგომის სემესტრში სწავლების ცენტრის მიერ შემუშავებული სასწავლო პროგრამა „საარჩევნო სამართლის დარგში“ განხორციელდება პარტნიორ 8 უმაღლეს სასწავლო დაწესებულებაში (სამცხე-ჯავახეთის სახელმწიფო უნივერსიტეტი,  აკაკი წერეთლის სახელმწიფო უნივერსიტეტი, თბილისის ღია სასწავლო უნივერსიტეტი,  გურამ თავართქილაძის სასწავლო უნივერსიტეტი, გრიგოლ რობაქიძის სახელობის უნივერსიტეტი, ილიას სახელმწიფო უნივერსიტეტი, საქართველოს დავით აღმაშენებლის სახელობის უნივერსიტეტი, გორის სახელმწიფო სასწავლო უნივერსიტეტი).

    სასწავლო პროგრამა მიზნად ისახავს სტუდენტების მიერ აუცილებელი პროფესიული ცოდნის გაღრმავებას საარჩევნო სამართალში, მათი პრაქტიკული უნარ-ჩვევების განვითარებასა და სამოქალაქო ცნობიერების ამაღლების ხელშეწყობას. აღნიშნული სასწავლო პროგრამა სრულ სემესტრს მოიცავს, რომელიც პარტნიორ უნივერსიტეტში ეტაპობრივად ხორციელდება.

    სასწავლო კურსის განხორციელების უზრუნველსაყოფად სწავლების ცენტრის მიერ მომზადდა შესაბამისი დამხმარე სახელმძღვანელოები, პრაქტიკული სავარჯიშოების კრებული და  ელექტრონული პრეზენტაციები.

    სწავლების ცენტის მიერ შემუშავებული აღნიშნული საგანმანათლებლო პროექტი უნივერსიტეტებში 2010 წლიდან ხორციელდება.

    სრულად

სიახლე