A
A A A
a A

სიახლეები ყველა სიახლე

  •  საარჩევნო სუბიექტებისა და სადამკვირვებლო ორგანიზაციების დავების განხილვის სტატისტიკა

    საარჩევნო სუბიექტებისა და სადამკვირვებლო ორგანიზაციების დავების განხილვის სტატისტიკა

    12 იანვარი, 2021

    ცენტრალურმა საარჩევნო კომისიამ (ცესკო) დაამუშავა ინფორმაცია 2020 წლის 31 ოქტომბრის საქართველოს პარლამენტის არჩევნების კენჭისყრის დღეს და შემდგომ პერიოდში საოლქო საარჩევნო კომისიებსა და ცესკოში შემოსული საჩივრების შესახებ (პირველი ტური).

    2020 წლის 31 ოქტომბრის პარლამენტის არჩევნებთან დაკავშირებით საოლქო საარჩევნო კომისიებში კენჭისყრის დღეს და შემდგომ პერიოდში სადამკვირვებლო ორგანიზაციებისა და საარჩევნო სუბიექტების მიერ სულ 2091 საჩივარი შევიდა. მათ შორის პოლიტიკურმა პარტიებმა/საარჩევნო ბლოკებმა წარადგინეს 1 425, სადამკვირვებლო ორგანიზაციებმა 629, საინიციატივო ჯგუფებმა 33 (ორი საინიციატივო ჯგუფი), საოლქო საარჩევნო კომისიების წევრებმა 2 და მედიაორგანიზაციებმა 2 საჩივარი. საერთო ჯამში დაკმაყოფილდა/ნაწილობრივ დაკმაყოფილდა 270, არ დაკმაყოფილდა 698, ხოლო გასაჩივრების ვადისა და წესის დარღვევის გამო განუხილველი დარჩა 1117, გაითხოვეს 4 და რეაგირებისთვის შესაბამის ორგანოს გადაეგზავნა 2 საჩივარი. საოლქო საარჩევნო კომისიებში საჩივრები 31 ოქტომბრის არჩევნებისთვის რეგისტრირებული 50 პოლიტიკური პარტია/საარჩევნო ბლოკიდან 14-მა, ხოლო ცესკოში რეგისტრირებული 120 ადგილობრივი სადამკვირვებლო ორგანიზაციიდან 21-მა შეიტანა.

    აღსანიშნავია, რომ განუხილველად დატოვებული საჩივრების დიდი წილი პოლიტიკური პარტიების/ბლოკების მიერ გასაჩივრების ვადისა და წესის დარღვევით წარდგენილ საჩივრებზე მოდის. ვადისა და წესის დარღვევით წარდგენილი 1117 საჩივრიდან 971 სწორედ პოლიტიკური პარტიების/ბლოკების მიერ იყო წარდგენილი. დეტალური სტატისტიკა იხილეთ: ცხრილი 1

    ცესკომ ასევე დაამუშავა ინფორმაცია საოლქო საარჩევნო კომისიების შედეგების (შემაჯამებელი ოქმების) ცესკოში გასაჩივრების შესახებ.

    საოლქო საარჩევნო კომისიების შედეგები (შემაჯამებელი ოქმები) ცესკოში იმ 14 პოლიტიკური პარტიიდან/საარჩევნო ბლოკიდან, რომლებსაც საჩივრები საოლქო კომისიებში ჰქონდათ შეტანილი, ექვსმა პოლიტიკურმა პარტიამ/ბლოკმა და 21 სადამკვირვებლო ორგანიზაციიდან კი მხოლოდ ერთმა ორგანიზაციამ გაასაჩივრა. დეტალური სტატისტიკა იხილეთ: ცხრილი 2

    აღსანიშნავია, რომ საოლქო საარჩევნო კომისიებში წარდგენილი საჩივრების სტატისტიკა მომზადებულია ოფიციალურად შემოსული და საჩივრების რეესტრში ასახული ინფორმაციის საფუძველზე.

    სრულად
  • საარჩევნო ადმინისტრაციამ სოციალურად დაუცველ ოჯახებს დამდეგი ახალი წელი მიულოცა

    საარჩევნო ადმინისტრაციამ სოციალურად დაუცველ ოჯახებს დამდეგი ახალი წელი მიულოცა

    30 დეკემბერი, 2020

    საარჩევნო ადმინისტრაციამ მძიმე სოციალურ პირობებში მყოფ და სხვადასხვა საჭიროების მქონე ოჯახებს დამდეგი ახალი წელი მიულოცა. როგორც ცენტრალური საარჩევნო კომისიის (ცესკო), ისე საოლქო საარჩევნო კომისიების წარმომადგენლებმა მარტოხელა, ასევე ხანდაზმულ პირებს, მრავალშვილიან და სოციალურად დაუცველ ოჯახებს თბილისსა და რამდენიმე რეგიონში საკვები პროდუქტების შესაძენი ბარათები გადასცეს. 32 ოჯახს ასევე გადაეცა პანდემიის პირობებში ჯანმრთელობის უსაფრთხოებისთვის აუცილებელი ინდივიდუალური დაცვის საშუალებები. ცესკოს თავმჯდომარე, თამარ ჟვანიამ დამდეგი შობა-ახალი წელი ერთ-ერთ მრავალშვილიან ოჯახს მიულოცა და საჩუქრად საახალწლო ნობათიც გადასცა. 

    აღსანიშნავია, რომ საარჩევნო ადმინისტრაციის ბენეფიციარებს შორის არიან „სამოქალაქო საზოგადოების განვითარების ცენტრის“ საქველმოქმედო აქციაში ჩართული ოჯახები, რომელთა შესახებ ცესკოს ინფორმაცია უშუალოდ ორგანიზაციამ მიაწოდა.  

    სრულად
  • განცხადება საუბნო შემაჯამებელი ოქმების ე.წ. დისბალანსთან დაკავშირებით

    განცხადება საუბნო შემაჯამებელი ოქმების ე.წ. დისბალანსთან დაკავშირებით

    16 დეკემბერი, 2020

    ცენტრალური საარჩევნო კომისია (ცესკო), მაღალი საზოგადოებრივი ინტერესიდან გამომდინარე, მიზანშეწონილად მიიჩნევს გამოეხმაუროს „სამართლიანი არჩევნების“ მიერ გავრცელებულ ინფორმაციას ე.წ. დისბალანსებთან დაკავშირებით, რომელიც ორგანიზაციამ როგორც 1 ნოემბერს, ისე 11 დეკემბერს პარალელური დათვლის დაზუსტებულ შედეგებთან ერთად გამოაქვეყნა.

    ცესკოს მიერ დამუშავებული მონაცემების მიხედვით, ე.წ. დისბალანსი, რომელიც უკავშირდება ბიულეტენების მეტობას არჩევნებში მონაწილეთა  რაოდენობასთან მიმართებაში, საქართველოში გახსნილი ძირითადი საარჩევნო უბნების მხოლოდ 19 შემაჯამებელ ოქმში -  0,52%-ში ფიქსირდება. შეგახსენებთ, რომ საქართველოს მასშტაბით, გახსნილი იყო 3 657 ძირითადი საარჩევნო უბანი (ამ უბნებში არ შედის სპეციალური და საზღვარგარეთ შექმნილი საარჩევნო უბნები). შესაბამისად, ორგანიზაციის მხრიდან, ბიულეტენების სიჭარბეზე აპელირება, რაც მათი განცხადებით, საარჩევნო უბნების 8%-ზე დაფიქსირდა, ოფიციალური მონაცემებით არ დასტურდება. 

    აღსანიშნავია, რომ საარჩევნო ადმინისტრაციამ, ჯერ კიდევ 4 ნოემბერს, დეტალურად დაამუშავა მონაცემები და მოამზადა სტატისტიკური ინფორმაცია საუბნო შემაჯამებელი ოქმებისა და შესაბამისი შესწორების ოქმების საფუძველზე.  სწორედ ამ ეტაპზე დამუშავებული სტატისტიკური მონაცემების მიხედვით ის დისბალანსი, რომელიც იწვევდა კითხვებს და უკავშირდება ბიულეტენების მეტობას არჩევნებში მონაწილეთა რაოდენობასთან (მონაწილეთა ხელმოწერები) მიმართებაში, ფიქსირდებოდა 60 საარჩევნო უბანზე, რაც წარმოადგენს საქართველოში გახსნილი ძირითადი საარჩევნო უბნების საერთო რაოდენობის 1.64%-ს.

    შემდგომში, საოლქო საარჩევნო კომისიების მიერ შესწავლის და კანონმდებლობით გათვალისწინებული სამართლებრივი მექანიზმების შესაბამისად, საოლქო საარჩევნო კომისიების განკარგულებებისა და გადათვლების საფუძველზე გარკვეულ შემთხევებში დაზუსტდა ე.წ. დისბალანსები.  შესაბამისად, საბოლოო მონაცემებით, პროპორციული შემაჯამებელი ოქმების ნაწილში, ბიულეტენების მეტობა  ამომრჩეველთა რაოდენობასთან მიმართებაში საქართველოში გახსნილი ძირითადი საარჩევნო უბნების  19 ოქმში ფიქსირდება.  აღნიშნული ინფორმაცია დამუშავებულია 14 ნოემბრის მდგომარეობით და დეტალური ცხრილი განთავსებულია ცესკოს ვებგვერდზე.

    იხილეთ დეტალური სტატისტიკა საუბნო საარჩევნო კომისიების მიხედვით (გამოქვეყნდა 15 ნოემბერს)

    ასევე, ცესკომ გამოაქვეყნა ბიულეტენების ნაკლებობის შემთხვევებზე სტატისტიკური ინფორმაცია სხვადასხვა წლებში ჩატარებული არჩევნების მიხედვით (გამოქვეყნდა 15 ნოემბერს)

    ზემოაღნიშნული ინფორმაციის გათვალისწინებით, გაურკვეველი რჩება ზუსტად რას გულისხმობს „სამართლიანი არჩევნების“ მიერ დასახელებული ბიულეტენების მეტობის ე.წ. დისბალანსი საარჩევნო უბნების 8%-ზე. ეს მონაცემი რადიკალურად განსხვავებულია და არსებითად აცდენილია საუბნო შემაჯამებელი ოქმების დამუშავებულ ცესკოს ოფიციალურ სტატისტიკურ მონაცემებს როგორც 4 ნოემბრის მდგომარეობით, ისე საბოლოო მონაცემების მიხედვით.

    შესაძლოა დავუშვათ ვარაუდი, რომ ორგანიზაციამ არ გაითვალისწინა საუბნო საარჩევნო კომისიების შესწორების ოქმები, რომელიც საუბნო შემაჯამებელი ოქმების განუყოფელი ნაწილია და არაერთი არჩევნებია წარმოადგენს დამკვიდრებულ საკანონმდებლო მექანიზმს. სწორედ ამიტომ, აღნიშნული საჭიროებს დაზუსტებას და მეტი ინფორმაციის წარმოდგენას, რაც აუცილებელია საკითხის ობიექტური შესწავლის, შეფასებისა და ზოგადად პროცესის სანდოობისთვის.

    საარჩევნო ადმინისტრაცია გამოთქვამს მზადყოფნას ამ და ნებისმიერ სხვა საარჩევნო საკითხთან დაკავშირებით, ითანამშრომლოს როგორც "სამართლიან არჩევნებთან", ისე ნებისმიერ დაინტერესებულ მხარესთან.

    სრულად
  • თამარ ჟვანიამ პარლამენტის პირველ სხდომაზე არჩევნების შედეგები წარადგინა

    თამარ ჟვანიამ პარლამენტის პირველ სხდომაზე არჩევნების შედეგები წარადგინა

    11 დეკემბერი, 2020

    ცენტრალური საარჩევნო კომისიის  (ცესკო) თავმჯდომარე თამარ ჟვანიამ პარლამენტის პირველ სხდომაზე არჩევნების შედეგები წარადგინა. მეათე მოწვევის პარლამენტის სხდომაზე ცესკოს თავმჯდომარემ დეტალურად ისაუბრა როგორც არჩევნების პირველი, ისე მეორე ტურის შესახებ და აღნიშნა, რომ საარჩევნო ადმინისტრაციის მიერ დაცული იყო ყველა პირობა რათა მოქალაქეებს ჰქონოდათ შესაძლებლობა თავისუფალ გარემოში დაეფიქსირებინათ საკუთარი არჩევანი. 

    „2020 წლის 31 ოქტომბრის არჩევნები იყო კონკურენტულ გარემოში ჩატარებული არჩევნები, რომლის ორგანიზების პროცესშიც გათვალისწინებული იყო ყველა მნიშვნელოვანი გამოწვევა და მათ შორის, განსაკუთრებული პრიორიტეტულობით პანდემიასთან დაკავშირებული საკითხები,“ - განაცხადა თამარ ჟვანიამ. მან ასევე აღნიშნა, რომ ცენტრალურმა საარჩევნო კომისიამ, საერთაშორისო პრაქტიკის გათვალისწინებით, შესაბამის უწყებებთან კოორდინაციით და საარჩევნო პროცესებში ჩართულ მხარეებთან აქტიური კონსულტაციების საფუძველზე შეიმუშავა ეპიდემიოლოგიური პროტოკოლი, რომელიც მიზნად ისახავდა ვირუსის გავრცელების პრევენციას და საარჩევნო პროცესის  მონაწილეთა უსაფრთხოებას. ეპიდემიოლოგიური პროტოკოლი სრულყოფილად მოიცავდა ჯანმრთელობის უსაფრთხოების საკითხებს მათ შორის კენჭისყრის დღისთვის, რაც მონაწილე მხარეების მიერ იყო დიდწილად გაზიარებული და დაცული, როგორც წინასაარჩევნო პერიოდში საარჩევნო ადმინისტრაციასთან ურთიერთობებში, ისე უშუალოდ არჩევნების დღეს. ცესკომ პანდემიასთან დაკავშირებულ წესებზე აწარმოა მასშტაბური ინფორმირების კამპანია, საერთაშორისო პარტნიორების მხარდაჭერით უზრუნველყო ყველა პირობა, რომ ამომრჩეველს საარჩევნო უბანზე მისვლისას  ჯანმრთელობისთვის უსაფრთხო გარემო შექმნოდა. კენჭისყრის დღეს, ურთულესი გამოწვევის - პანდემიის პირობებში კომისიის წევრთა მნიშვნელოვანი რაოდენობის ცვლილებების მიუხედავად, საარჩევნო ადმინისტრაციამ შეძლო, რომ ყველა საარჩევნო უბანი მომსახურებოდა ამომრჩეველს და სრულყოფილი ორგანიზება გაეწია  პარლამენტის არჩევნებისთვის.

    სიტყვით გამოსვლისას ცესკოს თავმჯდომარემ ასევე გაამახვილა ყურადღება ამერიკის შეერთებული შტატების მთავრობის მხარდაჭერაზე - „პანდემიის პირობებში არჩევნების ჩატარებას მნიშვნელოვნად შეუწყო ხელი ამერიკის შეერთებული შტატების მთავრობის მხარდაჭერამ - საერთაშორისო განვითარების სააგენტოსთან (USAID), საარჩევნო სისტემების საერთაშორისო ფონდთან (IFES) და აშშ-ის საელჩოსთან მჭიდრო თანამშრომლობით, ჩვენ შევძელით ყველა დონის საარჩევნო კომისიის პროტოკოლით გათვალისწინებული აუცილებელი ინვენტარით და პერსონალური დაცვის საშუალებებით აღჭურვა.“

    რაც შეეხება სტაციონარულ სამკურნალო დაწესებულებებსა და იზოლაციაში (თვითიზოლაცია, კარანტინი) მყოფ მოქალაქეებს და მათი არჩევნებში მონაწილეობის უზრუნველყოფას, ცესკოს თავმჯდომარემ აღნიშნა, რომ ადმინისტრაციამ თითოეული მუნიციპალიტეტის საზღვრებში შექმნა სპეციალური უბნები და მისცა მოქალაქეებს შესაძლებლობა, იზოლაციის მიუხედავად, მიეღოთ კენჭისყრაში მონაწილეობა.

    „აღსანიშნავია, რომ საარჩევნო ადმინისტრაციას წელს გამორჩეულად დაძაბულ პოლიტიკურ გარემოში მოუწია საკუთარი საქმიანობის განხორციელება, ისეთ პირობებში, როდესაც მიმდინარეობდა კამპანიური ხასიათის ზეწოლა ორგანიზაციაზე: პერმანენტულად, უწყვეტ რეჟიმში ვრცელდებოდა სხვადასხვა ტიპის დეზინფორმაცია ადმინისტრაციის დისკრედიტაციის მიზნით; გამოიყენებოდა ინსტიტუციაზე ზეწოლის სრულიად მიუღებელი ფორმები, კომისიებს უწევდათ სტრესულ გარემოში საკუთარი საქმიანობის განხორციელება, თუმცა საარჩევნო ადმინისტრაციამ, კანონმდებლობის სრული დაცვით შეასრულა ყველა ის საჭირო პროცედურა, რაც არჩევნების მთლიანი პროცესის წარმართვისთვის იყო აუცილებელი; ესეც იყო ერთ-ერთი ურთულესი გამოწვევა, რომლის მიუხედავადაც შევძელით მოვმსახურებოდით ამომრჩევლებს პროფესიულ დონეზე და მათთვის შევქმენით ის პირობები, სადაც დაცული იყო მათი უმთავრესი უფლებები.

    აქვე, მინდა მოქალაქეებს საარჩევნო ადმინისტრაციის სახელით გადავუხადო მადლობა იმისათვის, რომ მოვიდნენ არჩევნებზე, გამოიჩინეს მაღალი მოქალაქეობრივი პასუხისმგებლობა და ეპიდემიოლოგიური პროტოკოლის სრული დაცვით აქტიურად მიიღეს კენჭისყრაში მონაწილეობა. მოქალაქეების ჩართულობა საარჩევნო პროცესში, მოქალაქეობრივი პასუხისმგებლიანი დამოკიდებულება არჩევნების პროცესისადმი არის უმთავრესი წინაპირობა ჩვენი საზოგადოებისა და ქვეყნის წარმატებული განვითარებისთვის, რისთვისაც კიდევ ერთხელ გიხდით მადლობას.

    ასევე, მინდა მადლობა გადავუხადო არჩევნებში ჩართულ მხარეებს, - მათ ვინც საკუთარი უფლება-მოვალეობების შესრულებისას პირველ რიგში კანონმდებლობით, საკუთარი პროფესიონალიზმით იხელმძღვანელეს და ხელი შეუწყვეს საარჩევნო პროცესს და კენჭისყრის დღის გამჭვირვალე გარემოში, პროფესიულ დონეზე წარმართვას.

    ჩვენ ვართ ახალგაზრდა დემოკრატიის ქვეყანა; სულ რაღაც რამდენიმე ათწლეულია რაც ამ პროცესს ვაშენებთ და არჩევნები ამ წლების განმავლობაში დემოკრატიული პროცესების განვითარების უმნიშვნელოვანეს საფუძვლად იქცა. საერთაშორისო საზოგადოების მიერ წლევანდელი არჩევნები შეფასდა როგორც კონკურენტული, სადაც ყურადსაღები ხარვეზების მიუხედავად, დაცული იყო გამოხატვის თავისუფლება და ფუნდამენტური უფლებები. ცხადია ის განსახილველი საკითხები და რეკომენდაციები, რომლებიც ჩვენი ქვეყნის პარტნიორების მიერ არის მოწოდებული პროცესის გაუმჯობესების მიზნებისთვის, მნიშვნელოვანი დატვირთვის მატარებელია. შესაბამისად, ერთობლივი ძალისხმევით მნიშვნელოვანი საქმიანობებია განსახორციელებელი ჩვენი ქვეყნის ევროინტეგრაციის გზაზე, დემოკრატიის გაძლიერებისა და უწყვეტი მომავალი განვითარებისთვის.

    და ბოლოს, 2020 წლის 31 ოქტომბრის საქართველოს პარლამენტის არჩევნებზე ორ მილიონამდე ამომრჩეველმა გამოხატა საკუთარი ნება, მიიღო კენჭისყრაში მონაწილეობა და დააფიქსირა საკუთარი გადაწყვეტილება. საქართველოს მოქალაქეებმა აირჩიეს მეათე მოწვევის პარლამენტი, რომელიც, იმედი მაქვს, გააგრძელებს ჩვენი ახალგაზრდა დემოკრატიის მშენებლობის და განვითარების პროცესს!

    გისურვებთ წარმატებებს თქვენს მომავალ კანონშემოქმედებით და საზოგადოებისთვის სასიკეთო საქმიანობაში!“ - განაცხადა ცესკოს თავმჯდომარემ.

    სიტყვით გამოსვლის დასრულების შემდეგ თამარ ჟვანიამ პარლამენტის წევრთა უფლებამოსილების ცნობისთვის საჭირო დოკუმენტაცია დროებით სამანდატო კომისიას გადასცა, რომელმაც თავის მხრივ დადგენილებით ცნო პარლამენტის წევრთა უფლებამოსილება პარლამენტის დროებითი სამანდატო კომისიის მიერ წარდგენილი ერთიანი სიით. 

    სრულად
  • ცესკოს თავმჯდომარე თამარ ჟვანია დიდი ბრიტანეთის ელჩს შეხვდა

    ცესკოს თავმჯდომარე თამარ ჟვანია დიდი ბრიტანეთის ელჩს შეხვდა

    10 დეკემბერი, 2020

    ცენტრალური საარჩევნო კომისიის (ცესკო) თავმჯდომარე თამარ ჟვანია დიდი ბრიტანეთის ელჩს საქართველოში მარკ კლეიტონს შეხვდა.

    თამარ ჟვანიამ ელჩს დეტალური ინფორმაცია მიაწოდა 2020 წლის 31 ოქტომბრის პარლამენტის არჩევნების კენჭისყრის დღის შემდგომი პროცესების შესახებ და აღნიშნა, რომ საარჩევნო ადმინისტრაციამ პანდემიის პირობებში შეძლო პროფესიულ დონეზე არჩევნების ორგანიზება და თითოეულ ამომრჩეველს საარჩევნო უბანზე ჯანმრთელობისთვის უსაფრთხო გარემოში ჰქონდა შესაძლებლობა დაეფიქსირებინა საკუთარი არჩევანი. თამარ ჟვანიას განცხადებით, საარჩევნო ადმინისტრაციამ შესაბამისი საარჩევნო დავების განხილვისას ასევე, საარჩევნო კომისიების მიერ შემაჯამებელი ოქმების მონაცემების გადამოწმებისა და გადათვლის პროცესის წარმართვით გამოხატა მზაობა ხარვეზების გამოსასწორებლად, რომლებიც საპარლამენტო არჩევნების მიმდინარეობის დროს გამოვლინდა. ცესკოს თავმჯდომარემ ასევე ისაუბრა იმ მიზანმიმართულ კამპანიაზე, რომელიც საარჩევნო ადმინისტრაციის და პროცესის დისკრედიტაციის მიზნით განხორციელდა, მათ შორის არასწორი და მცდარი ინფორმაციის გავრცელების კუთხით, რომელთა თაობაზეც ცესკომ ზუსტი ინფორმაცია და შესაბამისი სტატისტიკური მონაცემები მიაწოდა საერთაშორისო ორგანიზაციებს და სხვა ჩართულ მხარეებს.

    როგორც შეხვედრის დასასრულს დიდი ბრიტანეთის ელჩმა მარკ კლეიტონმა განაცხადა, ის მხარდაჭერას უცხადებს საქართველოს საარჩევნო ადმინისტრაციას და მომავალში თანამშრომლობის გაღრმავების იმედს გამოთქვამს. მისი თქმით, ყველა ის რეკომენდაცია, რომელიც საერთაშორისო ორგანიზაციებისა და საქართველოში აკრედიტებული საელჩოების წარმომადგენლების მიერ იქნა გამოთქმული, უნდა იყოს გათვალისწინებული მომავალი საერთო არჩევნების ადმინისტრირების პროცესში.

    შეხვედრა, 9 დეკემბერს ცენტრალურ საარჩევნო კომისიაში გაიმართა.

    სრულად
  • ცენტრალურმა საარჩევნო კომისიამ საქართველოს პარლამენტის 2020 წლის 31 ოქტომბრის არჩევნები შეაჯამა

    ცენტრალურმა საარჩევნო კომისიამ საქართველოს პარლამენტის 2020 წლის 31 ოქტომბრის არჩევნები შეაჯამა

    3 დეკემბერი, 2020

    ცენტრალურმა საარჩევნო კომისიამ (ცესკო) დღეს გამართულ სხდომაზე საქართველოს პარლამენტის 2020 წლის 31 ოქტომბრის არჩევნების საბოლოო შედეგები შეაჯამა.

    შემაჯამებელი ოქმის თანახმად,   ამომრჩეველთა საერთო რაოდენობამ შეადგინა 3 511 853. პროპორციული საარჩევნო სისტემით ჩატარებულ არჩევნებში მონაწილეობა 1 992 891-მა ამომრჩეველმა მიიღო.

    შემაჯამებელ ოქმში დეტალურად არის ასახული ინფორმაცია საარჩევნო სუბიექტების მიერ მიღებული ხმების პროცენტების და მანდატების შესახებ. დოკუმენტაციას შეჯამების თაობაზე, ცენტრალური საარჩევნო კომისია გადასცემს საქართველოს პარლამენტს, საკანონმდებლო ორგანო კი არჩევნების შედეგების შეჯამებიდან არაუგვიანეს მეათე დღისა მართავს პარლამენტის პირველ სხდომას.

    შეგახსენებთ, რომ საქართველოს პარლამენტი შედგება პროპორციული სისტემით არჩეული 120 და მაჟორიტარული სისტემით არჩეული 30 პარლამენტის წევრისაგან.

    აღსანიშნავია, რომ საარჩევნო ადმინისტრაციამ ურთულესი გამოწვევის, პანდემიის პირობებში შეძლო არჩევნების ორგანიზება ამომრჩევლების ჯანმრთელობისთვის უსაფრთხო გარემოში. არჩევნების დღეს დაცული იყო ყველა პირობა იმისათვის, რომ საარჩევნო უბანზე მოქალაქეებს თავისუფალ გარემოში ჰქონოდათ შესაძლებლობა დაეფიქსირებინათ მათი არჩევანი. აღსანიშნავია, რომ ცესკომ უზრუნველყო სტაციონარულ სამკურნალო დაწესებულებებსა და იზოლაციაში (კარანტინი, თვითიზოლაცია) მყოფი პირების კენჭისყრაში მონაწილეობა.

    საარჩევნო ადმინისტრაციისთვის თითოეული ამომრჩეველი არის უმნიშვნელოვანესი, მათი აქტივობა და მოქალაქეობრივი პასუხისმგებლობა არის უპირველესი და მადლობას ვუხდით თითოეულ მათგანს, იმისათვის, რომ მოვიდნენ საარჩევნო უბანზე და მიიღეს კენჭისყრაში მონაწილეობა, როგორც არჩევნების პირველ, ისე მეორე ტურზე.

    საარჩევნო ადმინისტრაცია ასევე მადლობას უხდის საარჩევნო პროცესებში ჩართულ ყველა იმ მხარეს, რომლებიც პასუხისმგებლობით მოეკიდნენ საკუთარი უფლება-მოვალეობების შესრულებას და ხელი შეუწყვეს კენჭისყრის დღის პროფესიულ გარემოში წარმართვას.

    საარჩევნო ადმინისტრაციამ  სხვადასხვა ასპექტებით გამოწვეულ დაძაბულ გარემოში, ადმინისტრაციაზე ზეწოლისა და ზემოქმედების მიუღებელი ფორმების მიუხედავად, იმ პირობებში, როდესაც მასობრივად ვრცელდებოდა სხვადასხვა ტიპის დეზინფორმაცია დამოუკიდებელი ინსტიტუციის დისკრედიტაციის მიზნით და რაც მთლიანობაში წარმოადგენდა საარჩევნო ადმინისტრაციის დამაზიანებელი კამპანიის ნაწილს, კანონმდებლობის სრული დაცვით განახორციელა ყველა ის საჭირო პროცედურა, რაც არჩევნების მთლიანი პროცესის წარმართვისთვის იყო აუცილებელი.

    ქვემოთ მოცემულ ცხრილში წარმოდგენილია ინფორმაცია საარჩევნო სუბიექტების მანდატების რაოდენობის შესახებ პროპორციული სისტემით ჩატარებული არჩევნების მიხედვით. საარჩევნო კანონმდებლობით დადგენილი ბარიერი 9 საარჩევნო სუბიექტმა გადალახა. 

     

     

    პარტიის (ბლოკის) დასახელება

     

    მიღებული ხმების რაოდენობა

     

    %

     

    მიღებული მანდატების რაოდენობა

    2

    „ბაქრაძე, უგულავა, ბოკერია - ევროპული საქართველო - მოძრაობა თავისუფლებისთვის“

    72 986

    3.79%

    5

    5

    ბლოკი „ერთიანი ნაციონალური მოძრაობა-გაერთიანებული ოპოზიცია „ძალა ერთობაშია”

    523 127

    27.18%

    36

    8

    „დავით თარხან-მოურავი, ირმა ინაშვილი - საქართველოს პატრიოტთა ალიანსი”

    60 480

    3.14%

    4

    10

    „შალვა ნათელაშვილი-საქართველოს ლეიბორისტული პარტია“

    19 314

    1.00%

    1

    24

    „ალეკო ელისაშვილი-მოქალაქეები“

    25 508

    1.33%

    2

    27

    ბლოკი „გიორგი ვაშაძე-სტრატეგია აღმაშენებელი”

    60 671

    3.15%

    4

    36

    „გირჩი“

    55 598

    2.89%

    4

    41

    ქართული ოცნება - დემოკრატიული საქართველო

    928 004

    48.22%

    60

    56

    „ლელო - მამუკა ხაზარაძე“

    60 712

    3.15%

    4

    რაც შეეხება მაჟორიტარული სისტემით ჩატარებულ არჩევნებს, კანონიერ ძალაში შესულია საოლქო საარჩევნო კომისიების შემაჯამებელი ოქმები, რომელთა საფუძველზეც, 30-ვე მაჟორიტარულ საარჩევნო ოლქში პარლამენტის მაჟორიტარ წევრებად არჩეული არიან №41 „ქართული ოცნება - დემოკრატიული საქართველოს მიერ წარდგენილი კანდიდატები“.

    სრულად

სიახლე